خیرپور میں 14 اگست یومِ آزادی کے حوالے سے لیڈیز جِم خانہ خیرپور میں ایک شاندار اور رنگا رنگ کلچر فیسٹیول کا انعقاد کیا گیا۔ اس فیسٹیول میں خواتین اور بچوں نے بڑی دلچسپی اور جوش و خروش کے ساتھ شرکت کی اور مختلف پروگرامز سے خوب لطف اٹھایا۔
اس موقع پر مہمانِ خصوصی ڈپٹی کمشنر خیرپور فیاض حسین راہوجو، ایس پی خیرپور سردار حسن نیازی، اسٹیپ فاؤنڈیشن کی چیئرپرسن میڈم شائستہ بلوچ، پروگرام کی منتظم حنا شاہ جیلانی، اسٹیپ فاؤنڈیشن کے جنرل سیکرٹری ضلع خیرپور تسلیم احمد کورائی، مختیار ملک سمیت معزز شخصیات نے اپنی شرکت سے تقریب کو چار چاند لگا دیے۔
آنے والے مہمانوں کا پرتپاک استقبال کیا گیا، پھولوں کے ہار پہنائے گئے اور ان کی آمد پر خیرمقدمی کلمات پیش کیے گئے۔
یومِ آزادی کے موقع پر SOS اسکول، مائی فیلوشپ اسکول اور گلوبل انسٹیٹیوٹ خیرپور کے طلبہ و طالبات نے جوش و جذبے کے ساتھ تقریری مقابلوں، ملی نغموں، ٹیبلوز اور سوال جواب کے مقابلوں میں حصہ لیا۔ ہر بچے نے پاکستان سے اپنی محبت اور وفاداری کا اظہار خوبصورت انداز میں کیا۔
پوزیشن حاصل کرنے والے بچوں میں انعامات اور اسناد تقسیم کی گئیں تاکہ ان کی حوصلہ افزائی ہو۔ تقریب کے اختتام پر لیڈیز جِم خانہ خیرپور میں لگے مختلف ثقافتی اور دستکاری کے اسٹالز کا دورہ کیا گیا، جہاں روایتی کھانوں، ہنر مند خواتین کے ہاتھ کے بنے کپڑوں اور جیولری کو شائقین نے بے حد پسند کیا۔
یہ تقریب نہ صرف تفریح اور ثقافت کا امتزاج تھی بلکہ حب الوطنی کے جذبے کو بھی مزید اجاگر کرنے کا ایک خوبصورت ذریعہ ثابت ہوئی۔
